Gərək

simaOktyabr 1, 2008 16:02

Gərək

Qaranquşların uçduğu göylərə qalxaq,

Asimanın ortasında parlayan

Yaz buludlarına baxaq,

Gecələr

Zülmətin darçın ətrindən məst olaraq

Axan bir ulduz tapıb

Ürəyimizdə arzu tutaq.

Gərək sevincdən

Göy qurşağı kimi rənglənək,

Baş vuraq sarıya, yaşıla, narınca,

Günəşin bir zərrəsi olaq,

Rədd edək acı kədəri.

Gərək incik dostun səsini eşidək,

Hissləri təmizləyək şübhələr qatından,

Nuru kənarda axtarmayaq,

O nur bizim içimizdə.

Gərək ürəyimizdə gizlənən sevgini

Dilimizə gətirək,

Deyək,

Doğma gözlərə baxaraq:

-Sənsiz yaşaya bilməm...

ŞeirlərimŞərhlər(0) 4

Mənim hekayəm rus saytında

simaSentyabr 26, 2008 16:04

26.09.2008 tarixdə Novaya Literatura rus saytında mənim bir hekayəm yerləşdirilib. Maraqlananlar elektron ədəbiyyat jurnalının

http://newlit.ru/ səhifəsinə və şəxsən mənim

http://newlit.ru/~ennagi/3532.html səhifəmə baxa bilərlər.

Ədəbiyyat xəbərləriŞərhlər(0) 8

Gəl, bu gün

simaSentyabr 19, 2008 19:35

Gəl, bu gün,

Məhz bu gün

Gündəlik qəzetləri cırıb ataq,

Səhifələrdən axan xəbər bombalarıyla

Maraqlanmayaq,

Çıxmayaq

Cəhənnəm kimi uğuldayan

Izdiham arasına,

Baxmayaq

Səs-küy içində boğulan insanlara,

Söndürək

Ölümləri evlərə dolduran TV-ləri,

Elektron sevgilimizə çevrilmiş

kompüterləri...

Bir müddət susaq.

Qalaq göz-gözə.

Baxaq cizgilərini unutduğumuz

Doğma üzlərə.

Soraq bir-birimizdən –

Hanı sənin təbəssümün,

Hanı sevgin, duyğuların,

Divanə ürəyin hanı?..

ŞeirlərimŞərhlər(1) 18

Xəbərlər

simaSentyabr 11, 2008 21:30

* Rusiya yazarları Prezidentə məktub yazaraq kitabxana işinə aid Qanunda dəyişilik etməyi xahiş edirlər. Qanuna əsasən, 2 il ərzində bütün kitabxanalar elektronlaşmalı və bütün kitablar (əsərlər) İnternet məkanına daxil olmalıdır. Yazarların fikrincə, bu onların müəllif hüququnun pozulması deməkdir, çünki elektron kitablar olan yerdə, təkrar nəşrlərə ehtiyac qalmır, bununla da yazarlar çörək ağaclarından məhrum olurlar. Yazıçılıq gəlir gətirməyən sahəyə çevrilir; yaxud pul qazanmaq istəyən yazarlar daha sürətli işləməli, hər ay yeni elektron kitablar yazmalıdırlar ki, acından ölməsinlər. Bu isə mətnin keyfiyyətini hökmən aşağı salacaq.

P.S. Biz də isə, elekronlaşdın, ya yox, fərqi yoxdur, yaradıcılıq hələ də qazanc gətirmir, detektiv və sevgi romanları yazmağa isə həvəs olmur

* Britaniyada ən gülməli kitab adı seçilib. “Yunanıstan kəndlərinin poçtalyonları və onların marka möhürlərinin nömrələri” broşürası tam qalibiyyət əldə edib. Belə müsabiqələr 1978-ci ildən etibarən hər il keçirilir. Bookseller kitabsatışı jurnalının saytını ziyarət etmiş oxucular 30 ən məzəli kitab adını seçiblər. Onların arasındakı “dahi” adlar:

· Lüt siçanlar üzrə İkinci beynəlxalq konfransın materialları

· Münasibətlərin yaxşılaşmasını istəyirsinizsə, öz ayaqlarınızdan başlayın

· Öldüklərini bilməyən insanlar: onlar heç nədən şübhələnməyən adamlara necə yapışır və bununla nə etməli

P.S. Yəqin, bizdə nəşr edilən kitablarda da maraqlı və “düşündürücü” adlar olmamış deyil...

Ədəbiyyat xəbərləriŞərhlər(1) 24

Zahir Əzəmətdən 3 şeir (rusca)

simaSentyabr 10, 2008 22:18

Tərcümə işini çox sevirəm. Şair Zahir Əzəmətin nə vaxtsa mənə bağışladığı "Divar yazıları" kitabından ürəyimi tutmuş bir neçə şeiri tərcümə etmişdim, indi onları bloguma qoyuram (müəllifin icazəsiylə). Zahirin şeirləri çoxdur, amma bəzilərinin aurasını rusca ifadə edə bilmədiyimə görə onların tərcüməsini sonralara saxlamışam.

Beləliklə...